حوار لم يأتي بفائدة
ماذا حدث وما رأيناه كان من عجب العجاب في وفاة كاتبنا الكبير نجيب محفوظ لم يحضر جنازته الكثير. و توفي في نفس اليوم احد لاعبي مصر ونجم الأهلي لاعبنا الجميل محمد عبدالوهاب ورأينا كم وعدد بالالاف حضروا جنازة اللاعب المحبوب من جماهيرةتعدوا العشرون الف..
★غباء أم ذكاء★
طبعا انا عارف ان اى نجم في كرة القدم جماهيره اكتر بكتير من اى أديب او مثقف .. لكن 20 قصاد 20 الف ، ده بيدل ان عندنا في مصر تحديدا فيه حاجة غلط .. مع كل المحبة والاحترام والترحم بالتأكيد على لاعب كان مثالا للأدب والأخلاق الرفيعة.. الكلام ده بقوله لواحد انا عارف انه غبي .. لكن مكنتش اتصور انه غبي للدرجة دي .. عن محمد رمضان أتحدث....
★قيمة أخلاقية أم قيم★
انا مش ضد ان الابراشي يستضيفه .. بالعكس .. كان لازم يجيبه عشان – حتى لو كان الابراشي ميقصدشي – اللي كان بيكرهه قيراط .. يكرهه ويحتقره 24 قيراط .. عشان اللي كان شايفه غبي بس .. يعرف انه المادة الاساسية اللي اتاخد منها الغباء .. انا شخصيا نفسي اقابله واعمل معاه لقاء صحفي .. بس حخلّيه بعد اللقاء ده يعتزل ويداري خيبته ، او يساومني : خد نص ثروتي .. خدها كلها .. وبلاش تنشره ابوس ايدك.
★حوار مع الأسطورة★
- ليه يارمضان ؟ .. مش انت نمبر ون والملك والاسطورة ؟
... ابوس رجلك بلاش.
- ياعم اهدى بس وخد نفسك .. ده انت جمهورك بالملايين!!
... أحب على راسك .. بلاش تنشر الحوار!
- ليه ياحبيبي .. مش انت بتقول ان اللي بيهاجموك نقطة في بحر اللي بيحبوك؟
... أنا حمار ومش فاهم!
★هل القافلة تسير★
- مش نشرت لقطة وانت في عربيتك اللامبرجيني بتشرب سيجار وتضحك وفيه كلب ماشي وراك يهوهو .. وعايز تقول لنا : الكلاب تنبح والقافلة تسير؟
... ياسيدي انا الكلب وابن كلب وملقتش حد يربيني!!
صدقوني مكنتش حسيبه فعلا الا لما يقولها بعضمة لسانه ويعرف انه فعلا حشرة ضارة ومقرفة ويستاهل ينداس عليها بالجزمة..
★نجم الجماهير★
الابراشي كانت نيّته يُظهر رمضان طيب وغلبان وابن حلال .. وان اللي بيعمله مجرد مراهقة وقلة عقل .. بس هو فنان ونجم وله جماهيره العريضة .. لكن رمضان – لأنه غبي – معرفش يستفيد من الفرصة ، فساهم بعقليته الفاسدة الجاهلة في زيادة حجم " القرفانين منه " .. واستمرار حملة مقاطعته والإسهام في نجاحها بغبائه هو مش بشطارة منظمي هذه الحملة!
★فن راقي★
انا شفت قصادي وانا بتفرج عليه انسان معتوه .. مش فاهم حاجة في اى حاجة .. بقولكم غبي .. بيسأله الابراشي عن عبده موتة والسنج والمطاوي والدبح .. فيرد : وهو كان نور الشريف في فيلم " العار " بيبيع سبح .. مش فاهم خالص ان الفن الراقي من خلال التركيز على حاجة وحشة وسيئة ، بُيعلي من قيمة حاجة تانية محترمة .. استشهد من جهله بفيلم يعتبر من أهم افلام السينما عندنا اللي خرجنا منه بقيمة راسخة في العقول : الفقر مش فقر الفلوس .. فقر النفوس.
★ضدالحكومة والبيه البواب★
والابراشي لأنه برضه مش فاهم يقول له : بس نور الشريف له افلام تانية جيدة .. وكأن " العار " فيلم عبيط ورمضان عنده حق .. وقال نفس الكلام عن احمد زكي اللي رمضان شافه في فيلم الامبراطور تاجرهيروين .. والابراشي بدل ما يبيّن له قيمة الفيلم ده .. يرد : بس احمد زكي عمل البرىء وضد الحكومة والبيه البواب.
★سذاجة حوارية ام رؤية★
يعني اللي بيسأل ساذج واللي بيجاوب متخلف عقليا
ازاى تصوّر نفسك جنب اسطول عربياتك وتتفاخر بيها؟ .. فيرد الافندي : انا عايز اقول لجمهوري ان العز اللي انا فيه ده منكم انتم ، ولولاكم مكنتش بقيت محمد رمضان.
... ايوه يارمضان .. بس كده انت بتستفز الناس اللي مش لاقية تاكل!
- دي ناس حاقدة ميهمنيش يكونوا من جمهوري
... طيب ازاى تقول على نفسك نمبر ون ؟
★مفهومية ومزاجنجي★
شوفوا بقى رد الاستاذ اللي كله مفهومية على رأى مزاجنجي في فيلم الكيف " قول يابتاع الكيماء يامتكيّف " : انا عايز أحفّز الناس الغلابة واقولهم انكم ممكن تبقوا زيّى وعندكم اكتر مني كمان .. هى فايزة احمد لما غنّت ست الحبايب ياجبيبة ، كانت بتغني لأمها ولا لكل الأمهات .. مش الأغنية دي خلّتنا كلنا نعرف قيمة أمهاتنا وخلّتنا نحبّهم كلهم!!
شوفوا المقارنة الغبية .. مابين معنى نمبر ون وست الحبايب .. ايه علاقة دي بدي .. بس اى كلام في اى كلام وخلاص!
★كابتن الطيارة★
طيب حكاية بقى كابتن الطيارة " اللي انا اساسا على فكرة مش متعاطف معاه خالص لأنه غبي هو كمان " : قطعت عيش الراجل وقعدّته في بيته .. مين يرضي بكده؟ .. ده الابراشي اللي بيسأله.
- انا مستعد أرضيه وادفع له راتبه من جيبي .. بس نصيحتي له انه يقدم تظلّم لشركة الطيران عشان يرجعوه ! .. الكابتن مستني محمد رمضان اللي خرب بيته يقول له قدم تظلم والتماس وربنا يسهل .. أكيد حيعطفوا عليك وترجع شغلك!!
★مشاهدات اليوتيوب★
.... مش عايز اتكلم كتير عن حكاية رمضان والكابتن لأني زي ماقلت .. الاتنين أغبى من بعض!
فيه حد يغني وهو عريان بالشكل ده .. وبعدين انت صوتك وحش .. بتغني ليه .. وانت ناقص فلوس ؟!
يرد رمضان : الناس مبسوطة وعاجبها اللون ده من الغنا والاستعراض .. تعالى شوف كمية المشاهدات على اليويتوب وياريت الاستاذ هاني شاكر يشوفها هو كمان!!
★حوار غير مفيد★
الابراشي معرفشي يرد .. مش عشان رمضان كبسه ورد عليه الرد اللي هو .. لكن عشان الابراشي نفسه لسه بيتعامل مع رمضان على انه نجم بجد مش مجرد فرقعة او بالونة منفوخة هوا لو شكتها بدبوس حتفرقع .. لكن انا بقى اللي حرد عليه
★المشاهدات مش مقياس★
يارمضان افندي ياكعب " الحمار " .. عدد مشاهدين افلام السكس بالمليارات .. اللي بيشوفوا فيديوهات حمو بيكا بالملايين .. فيديو واحد لواحدة " ؟ " اسمها سما المصري يقلب الدنيا رأسا على عقب .. ( تعالي اوريكي تثيري جوزك ازاى عشان ينام معاكي ويهنّيكي .. لو جوزك زعلان منك وعايزاه يصالحك .. هاتي خيشة وامسحي البلاط وانت لابسة كومبيني ضيق وقصير .. ووطىّ اوي .. راسك قرب الارض و " .... " فوق ، حيتجنن وينسى اهله ، ويبوس ايديك عشان انتي اللي ترضي عنه وتصالحيه)!
**********
" الوقاحة " يارمضان مفيش أسهل منها .. وبتجيب فلوس بالهبل .. اللي بيعملوا افلام بورنو مليونيرات .. وانت متفرقشي عنهم كتير .. انما برضه فيه نجوم عملت ملايين ، بس بفنها وذكائها وقدرتها على التواصل بشكل محترم .. انت بقى – لأنك اساسا مش نجم ولا فنان ولا ذكي ولا محترم – استسهلت المسألة .. وعرفت ان العبط والهبل بيجيب قرش .. بس اللي عنده دماغ بيعرف برضه يجيب القرش .. بس انت معذور .. مفيش دماغ بتلاتة تعريفة .. عقلك ممسوح بورنيش مستورد .. فنزل في رجليك وبقى يلمع ويبرق .. انت شايفه عقل .. واحنا شايفينه جزمة .. بتلمع أيوه مفيش كلام .. بس راحت ولا جت .. إيه ؟ .. جزمة!!
★فوق يارمضان★
فوق يارمضان .. انت ولا حاجة .. ولو كسبت مليارات .. برضه ولا حاجة .. بس على فكرة .. العيب مش عليك .. العيب على ناس كبار في البلد شايفينك نموذج ولبّسوك لبس " صاعقة " .. لبس رجالة بجد .. مستحملتوش ياحبة عيني وقلعته ولبست لنا شفتشي وطلعت تغني لنا ببوكسر .. وبدل ماتبقى نمبر ون للرجالة اللي على حق .. بقيت نمبر ون في الوساخة وقلة القيمة وقلة الأدب.!!
...
عايز تاني ولا كفاية عليك كده ؟ .. متهيألي كفاية أوي لحد كده!!!
Post a Comment